Føroyskt teknmál viðurkent í 3 ár.

Føroyskt teknmál viðurkent í 3 ár.

5 juli 2017 var ein stórur dagur fyri deyv í Føroyum. Eitt samt løgting játtaði at broyta kunngerðina um Málráðið, soleiðis at føroyskt teknmál eisini gjørdist alment føroyskt mál.

Skrevet af: Ingibjørg Jacobsen

Udgivet den: 05.07.2020

Nyhedsgrupper: Føroysk tíðindi

 

Tilgongdin at fáa teknmálið  viðurkent hevði tikið nógv ár,  har Deyvafelag  Føroya og onnur áhugaði javnan vendu sær til landsins myndugleikar um at fáa viðgjørt evni.

Føroyskt teknmál er eins og føroyskt talumál serstakt.  Tað hevur egna mállæru og ber egna mentan. Tað er rættiliga vanlig uppfatan millum fólk at teknmál er eitt altjóða mál. Tað er tað ikki. Tað líkist hinum norðurlendsku teknmálunum,  eins  og føroyskt eisini ger. 

Teknmál mennist har tað verður tosað. Man veit at húski við deyvum børnum,  mentu egin tekn,  áðrenn tað bleiv vanligt at fáa undirvísing.  Í mong ár fóru føroysk deyv til Danmarkar á  deyvaskúlar .  Í nýggjari tíð var tað Specialskúlin  og Skúlin á Trøðni,  ið bleiv miðdepil fyri undirvísing í og  á teknmáli. 

Tá fólk samskifta har ikki øll nýta teknmál verður tulkur brúktur.  Hesin tulkar millum føroyskt og teknmál.

Tað eru eisini fleiri,  ið nýta “ tekn til talu” ,  har bæði tekn og orð verða brúkt  í samskiftinum.

Atkoma -  er eitt hugtak, ið er nógv at hoyra í hesum døgum.  Tað er eisini galdandi fyri mál og mentan.  Tá talan er um teknmál merkir atkoma,  at  deyv og onnur teknmælt altíð hava atgongd til egið mál og at samskifta.  Tað merkir eisini at upplýsing, kunning og tíðindi eru atkomulig á báðum málum.

Hvussu er so støðan hjá føroyskum teknmáli,  nú 3 ár eru liðin síðani viðurkenningina?

Støðan er trupul.  Tað er ikki skipað frálæra í teknmáli.  Í skúlunum vera deyv ikki undirvíst á teknmáli og í samband við tulking,  av samskifti,  tíðindum og sjónvarpssendingum annars,  eru ikki nóg mikið av tulkum í starvi at nøkta tørvin.  Deyvafelag Føroya er javnan í samband við avvarandi myndugleikar um trupulleikarnar.

Tað skal tó eingin ivi verða um,  at vit gleðast um at føroyskt teknmál er viðurkent sum mál,  tí tað gevur rættindi  at seta fram ynskir og krøv á jøvnum føti við tey, ið nýta talumál.